luns, 26 de decembro de 2016

O historia do Apalpador

O Apalpador xa preparou os  agasallos e, a estas alturas,  ou xa pasou polas casas dos nenos e nenas a noite do 24, ou aínda terán que agardar po el ata a noite do día 31.
Pero antes diso, Sali contounos a historia deste personaxe



E tamén podedes ler este poema de Xurxo L. Valcárcel:




Agasalla unha lectura



Este ano decidimos que foran os rapaces  e rapazas os que recomendaran unha lectura aos seus compañeiros.
Para iso organizamos unha especie de "amigo invisible".
Cada un deles tivo que "agasallar" ao compañeiro ou compañeira que lle tocou por sorteo cun libro da biblioteca.
Claro que ... tivo que ter en conta os gustos do amigo...


Os agasallos foron repartidos o último dia de clase antes do descanso de Nadal.



AmigoInvisibleBiblio2016 by Slidely Slideshow

venres, 23 de decembro de 2016

Soños de Nadal


Soña o ceo,
soña a estrela,
soña o vento
e soña o mar.

Todos soñan co nadal.

Soña o neno que ten frío,
soña a nai que non ten lá.
Soña a neve que caera
o outro día polo chan.

E todos soñan e soñan
qué regalos traerán
os Tres que sempre soñaron
os Tres que pronto virán.

Para o neno unha chaqueta,
unha chaqueta de lá.
Para o ceo unha estrela
e para o vento e o mar


E ti, con que soñas este Nadal?

Con ter moitos agasallos?
Con que toque a lotaría na túa casa?
Con ...



Estes son os nosos soños:
Click to play this Smilebox slideshow
Create your own slideshow - Powered by Smilebox
Create a picture slideshow

domingo, 4 de decembro de 2016

O castro de Santomé

A existencia deste castro foi descuberta en 1920, pero non se comezou a escavar ata a década dos anos 70. Dende os anos 80 véñense realizando excavacións por parte do Museo Arqueolóxico de Ourense que puxeron ao descuberto gran número de edificacións, unha rúa empedrada e varias vivendas .
O castro foi habitado polos castrexos dende a idade de ferro, no século I a. de C. Na cima e na ladeira podemos ver restos de edificacións circulares e as bases dun torreón de vixiancia.
No século II d. de C. o poboado foi abandoado,  ata que cen anos despois volveu ser ocupado por outra civilización con características galaico-romanas que se asentou fóra das murallas. O máis sobresaínte desta época é a zona de vivendas que se atopa a entrada do complexo: unha casa cun patio porticado e un edificio de duas prantas con escaleiras exteriores e que contaba cun singular sistema de calefacción.

Pías excavadas nas rochas

Sáese do poboado por unha rúa empedrada, da que se conservan uns 30 metros.
En toda a área do castro podemos ver como as rochas foron utilizadas para excavar pías ou como elementos constructivos, servindo nalgúns casos de muros das casas.





Visita virtual a casa de dúas plantas:
Vista frontal da casa porticada:
Recorrido virtual pola casa porticada:

Na procura do pasado

Como sabedes. as nenas e nenos de 2º elixiron a Arqueoloxía como rama da ciencia a investigar durante este curso, dentro do Proxecto anual "Tol@s pola ciencia".
Para poñelos en situación, a profe decidiu visitar un castro... E o mais cercano, quitando o de Trelle que está sen excavar, é o de Santomé en Ourense.

Santomé está mergullado nun espeso bosque de carballos, sobreiras, érbedos e piñeiros. Nas áreas excavadas emerxen muros, debúxanse as formas das casas que aínda están aí, séntense os pasos dos homes e mulleres que alí habitaron de xeito interrumpido entre a Idade do Ferro e a fin do Imperio Romano. Contra o século I a.C., unha comunidade instalouse no castro, construíndo murallas e torreóns que nós recorremos coma se fosemos verdadeiros arqueólogos.

Despois achegámonos á sala de exposicións que o Museo Arqueolóxico de Ourense ten en San Francisco, pois as obras de reforma obrigan a manter pechadas  ao público as instalacións da Praza Maior. Alí unha arqueóloga de verdade explicounos as características das esculturas e outros obxectos castreños, algúns deles atopados no castro de Santomé. 


Na Procura do pasado by Slidely Slideshow

venres, 2 de decembro de 2016

25N: Educando en igualdade


O día 25 de novembro é un día para a reflexión.
 É necesario loitar con todas as nosas forzas para acabar coa violencia, e unha das mellores formas de facelo é a educación: só se educamos aos nenos e nenas na igualdade, na solidaridade e na tolerancia conseguiremos terminar con esta lacra.
Nós quixemos sensibilizar ao nosos alumnado para que valoren ás persoas, xa sexan homes ou mulleres, aprendendo que o traballo non ten sexo, que as persoas son libres para elixir e decidir o traballo que queren desempeñar na súa vida.

Traballamos os estereotipos
Tivemos uns momentos de reflexión sobre as profesións das persoas. Para comprobar como funcionan os estereotipos de xénero,  pedimos aos nenos e nenas que describisen a "unha persoa que opera",  unha persoa que conduce un camión", unha persoa que apaga incendios e rescata xente"... (evitando mencionar o seu sexo)
A maioría das respostas foron "é alto e forte, co pelo curto..."
- E como é unha persoa que axuda ao cirurxián, ou unha persoa que fai peiteados?   
 As respostas  foron : "alta, delgada,  co pelo longo..."     
Ao cabo,dixémoslles que iamos facer un xogo e entrou na biblioteca unha muller vestida cun chandal. 
Preguntámoslles  cal pensaban que era a súa profesión. Estas foron as respostas: 
- Entrenadora persoal
- Profesora de E. Física
- Dependenta 
- Mestra
- Enfermeira...

Dixémoslles que tiñan que adiviñar cal era a súa profesión facendo preguntas. Ela só podía responder si/non. 
A muller abandoou a biblioteca uns minutos e apareceu equipada co traxe que emprega diariamente no seu traballo: era BOMBEIRA.

Os rapaces e rapazas fixéronlle moitas preguntas sobre a súa profesión e sobre todo interesáronse polos perigos da mesma. Ela explicou que, ante todo, había que ter sangue frío para actuar en situacións límite e  que "nesta profesión non hai superheroes, todo se basea no traballo en equipo"


25N by Slidely Photo Gallery

xoves, 1 de decembro de 2016

25N: A escada da igualdade

Despois de ver a curta "A escada da violencia", pareceunos moi acaído traballar a igualdade entre nenos e nenas, homes e mulleres .
A cada clase démoslle un chanzo e tiveron que decoralo  cun lema que fixese referencia a igualdade, a amizade, o bo trato...
 Con todos os chanzos construímos a Escada da Igualdade
Nas clases de  EI, as profes  explicaron que os homes e as mulleres poden facer os mesmos traballos .



Rematamos cantando a canción Respecta e tolera (Marcando o ritmo coa música da canción  "We will rock you" de Queen):
Estamos en contra da violencia
xuntos dicímolo a VIVA VOZ
está nas túas mans, voucho a explicar
calquer conflicto se pode arranxar.
Frea a Violencia
Respecta e Tolera.

martes, 15 de novembro de 2016

Magosto en Toén: castañas e xogos

Como é tradicional por estas datas, xuntámonos todos no patio para festexar o magosto.
Mentres Bea e a profe Lali atendían as castañas para que non se queimaran, os nenos (e nenas) xogamos un anaco á corda, ao pano, os zancos, o Papacastañas e fixemos carreiras de sacos. porque a festa non sería tal sen contar cos xogos populares,
Pasámolo de medo!
Pero o que máis nos gusta, dende logo, é correr tralos compañeiros para tiznarlles a cara cos restos da fogueira .


Magosto 2016 - CEIP Saco e Arce by Slidely Slideshow

Polo magosto, castañas

Efrén converteuse en castañeiro e cociñou todas as castañas que trouxeron os  nenos e nenas.
Xa viñan moxetadas para que non estouparan e...
Que pensabades? que falaba de castañas de comer?
Pois non ...
falo das  plantillas de castaña que todos levamos á casa para decorar e pedir a colaboración  da familia para escribir un refrán , adiviña  ou cantiga referida ao magosto ou a castaña.
Colocámolas nun taboleiro para que  puidésemos ler todas as achegas.


Magosto2016 by Slidely Slideshow

domingo, 6 de novembro de 2016

Samaín de medo...

Siiii,... de medo!
De medo o pasamos asustando aos amigos e aos profes!
Samain by Slidely Slideshow

E de regalo... un conto terrorífico... "CADAVERCITA ROJA"
A ver se vos gusta ... e non morredes de medo!

Polo Samaín: Quimica Siniestra

O cole, como cada último día de outubro, encheuse de corvos negros, pantasmas, vampiros,  ratas  e monstros  para festexar o día dos espíritus.
Este ano, como introdución ao noso proxecto anual,  non podían faltar os científicos maléficos que prepararon apócemas siniestras para enmeigar a profes e nen@s e transformalos en criaturas aterradoras,  alterando os seus xenes e provocando mutacións nos seus corpos.....


Apocemas by Slidely Photo Gallery


No seguinte video podedes ver unha mostra dos esconxuros:

Lecturas compartidas

Os días de Lecturas Compartidas son esperados con ilusión por maiores e pequenos.
Atopar un libro que lle guste ao noso afillado ou afillada pode ser algo complexo, pero na biblioteca buscamos o libro que nos parece máis axeitado e ... comezamos a aventura!
A algúns gústalles ler e grupo e a outros por parellas, a unhas gústanlle os libros de animais e a outras de princesas... o caso é dar co libro e o lugar que máis nos guste...


LecturasCompartidas by Slidely Photo Gallery

luns, 31 de outubro de 2016

As mochilas comezan a andaina


Un ano máis as Mochilas Viaxeiras comezan a súa nadaina de casa en casa. 

Para os que non coñecedes a actividade, direivos que a Mochila que a vosa filla ou fillo levará á casa pretende proporcionar un motivo de encontro entre os membros da familia tomando como motivo o mundo dos libros e a lectura. 
A Mochila permite aos nenos e nenas levar á casa, en préstamo temporal (unha semana),  uns materiais que pretenden reforzar o vínculo entre a escola e a familia na súa labor común de formación dos lectores máis novos.
No interior da mochila vai a lista dos materiais que contén e unha folla que pretende ser un diario de viaxe. Os nenos completarán esta folla escribindo (a poder ser polos dous lados) sobre os materiais que máis lles chamaron a atención e vós podedes facernos chegar a vosa opinión sobre a actividade,

Esperamos que vos ilusione tanto como a eles!


Recordade  que é moi importante comprobar que todos os materiais estean de novo dentro da Mochila antes de devolvela á escola.

domingo, 30 de outubro de 2016

Madriñas e Padriños de Lectura

Os maiores prepararon con moita ilusión as súas tarxetas de agasallo para que os máis pequenos os elixisen como madriñas e  padriños lectores.

TArxetasApadriñamentoLEctor by Slidely Photo Gallery
Levamos a cabo o sorteo e ... todos contentos! Sobre todo os que xa participaron nesta actividade en anos anteriores.
Para os máis pequenos é unha novidade, pero seguro que non olvidarán estas Lecturas compartidas.


eliximosPadrinhos by Slidely Photo Gallery

luns, 24 de outubro de 2016

Dia da Biblioteca 2016

Hoxe celebramos o Día da Biblioteca. Este ano as autoras seleccionadas para a redacción do pregón e o deseño do cartel  foron   Ledicia Costas   e Elena Odriozola   . O acto conmemorativo celébrase  na Biblioteca Rexional Joaquin Leguina de Madrid. Como nos queda un pouco lonxe, invitámosvos a achegarvos a nosa BE e gozar das actividades que temos programadas.

Velaquí o texto de Ledicia na súa versión en galego:

luns, 3 de outubro de 2016

A vosa opinión importa

       
Imaxe do Blog Xoeliki.com
 Tendes algunha idea para mellorar o funcionamento da BE?

Queredes que merquemos un libro que vos gusta?

Apetécevos que realicemos algunha actividade en concreto? 

Ofrecémosvos un novo servizo no Bloguesquío : O buzón de suxestións. 


Picade na imaxe e seredes levados a páxina .

 So tendes que cubrir o formulario e envialo.

 A vosa opinión é importante. Terémola en conta.

sábado, 1 de outubro de 2016

Maxia ou ciencia?

29 de setembro : "Ilusionismo, maxia ou ciencia?"  nos Xardins do Posío

Na exposición de Cosmocaixa descubrimos moitas cousas interesantes sobre o funcionamento do noso cerebro e as maneiras de "enganalo" .
 Iso é  precisamente o que fan os magos: recurrir á ciencia para enganar ao noso cerebro creando ilusións ,  que son unha  combinación do que perciben os nosos sentidos e o que a nosa mente espera percibir.
A realidade que percibimos está construída a partires dos sinais que nos chegan a través dos sentidos. Todo o que percibimos, pensamos e coñecemos debémosllo ao noso cerebro. 
 E o noso cerebro, como descubrimos na exposición, traballa dunha maneira moi curiosa. Está preparado para seleccionar a información que máis lle interesa, completando o que falta e facendo as súas propias deduccións. Desta maneira, aforra esforzos, pero tamén provoca fallos nas interpretacións. 
O ilusionismo toma ventaxa destas fallos para contradicir as leis da física e a lóxica. Os trucos que practican os magos baséanse na observación e a experimentación e usan coñecementos científicos da física, as matemáticas ou a psicoloxía para manipular a nosa mente.
No seguinte video podedes facervos una idea do que vimos na exposición:


Maxia ou ciencia? by Slidely Slideshow

mércores, 28 de setembro de 2016

Tolos pola Ciencia


Pois... xa nos decidimos !

Este ano, o noso Proxecto Anual estará dedicado ao mundo das CIENCIAS.

Seguro que vai resultar gratificante para todos e todas, porque aprenderemos a través de experiencias que combinen o rigor científico co entretemento.
A ciencia non é unha actividade alonxada das actividades cotiás. Está ao noso redor e cada día utilizamos o pensamento científico  elaborando  hipóteses (que palabra máis rara!)  comprobándoas mediante o método de proba+erro e facendo preguntas, moooitas preguntas.
Así é como descubrimos  o mundo  que nos rodea e as súas leis.

Efrén xa ten preparado o laboratorio e todos os seus trebellos para demostrar que se pode aprender pasándoo de marabilla.

domingo, 25 de setembro de 2016

Ola de novo ...

Ola, amigas e amigos, 
Aqui estamos outra vez tralo descanso do verán, tralas horas de piscina ou de praia (que este ano abofé que foron moitas, grazas ao tempo que veu) e tralas horas pasadas diante das tabletas, ordenadores e consolas... e estou seguro de que  diante dalgún bo libro...
Comezamos, coma sempre con moitas gañas de falar, escoitar, descubrir novas cousas, relacionar a aprendizaxe teórica coa súa aplicación real... é dicir,  APRENDER.

Xa  estou preparando os carnés dos novos lectores e novas lectoras e comecei a preparar as mochilas viaxeiras. Agora estamos moi ocupados decidindo en que proxecto imos traballar este curso. 
Xa vos irei contando...

Vémonos na Biblio!

mércores, 29 de xuño de 2016

Fin de curso en San Simón

Ao saír do museo de Meirande  collemos un barco para ir á illa de San Simón. En realidade son dúas illas, unidas por unha ponte de pedra.


Son unhas illas con moita historia:


  • No  século XII estiveron habitadas por monxes templarios  e no século XIII por monxes franciscanos e benedictinos.
  • O trovador Meendinho dedicoulles unhas estrofas :"Sediam'eu na ermida de San Simón / e cercaronm'as ondas , que grandes son ... "
  •  Foron saqueadas por corsarios normandos e piratas ingleses, entre os que se encontra o famoso Francis Drake,  en varias ocasións. 
  • O mosteiro foi incendiado polos ingleses tras gañar a Batalla de Rande 
  • Despois dun século de abandono, en 1838 convértense en lazareto para tratar aos enfermos de cólera e lepra. Constrúense os actuais edificios: enfermería, hospitais, capela, embarcadeiros, cementerio e a ponte que une as dúas illas. Todos os barcos debían pasar pola illa antes de desembarcar no porto de Vigo. Na illa de San Antón estaba o "lazareto sucio" onde se situaban os enfermos que non tiñan cura e na illa de San Simón estaba o "lazareto limpo" on de estaban os que podían ter cura. En 1927 péchase o lazareto e a illa é abandoada.
  • En 1936 comeza a guerra civil española e as illas convértense en prisión e campo de traballos forzados para os contrarios ao réxime franquista.
  • Ao finalizar a guerra, en 1939, convertéronse en residencia de verán dos  militares franquistas e as súas familias.
  • En 1955 creouse un centro de formación e estudo para nenos orfos de mariñeiros que foi clausurado en 1963.
  • Hoxe en día, as illas están abertas ao público, pero é preciso ter un permiso. Os edificios  foron remodelados e os xardíns reconstruídos no ano 1999
Picade na seguinte ligazón para ver como era a illa antes da reconstrución e como a vimos nós na nosa visita ; https://youtu.be/5cZea1HscpE

E agora, o máis interesante... as fotos do noso  paseo polas illas de San Simón e San Antón.  
Click to play this Smilebox slideshow
Create your own slideshow - Powered by Smilebox
This free slideshow design personalized with Smilebox

martes, 28 de xuño de 2016

Arde Rande !

Todos e todas seguro que pasastes máis dunha vez  pola ponte de Rande
pero ... sabiades que nas profundidades do mar poida que se atope afundido un gran tesouro?
Gustariavos coñecer o que aconteceu en Rande hai mais de 300 anos?
Estades sentados? 
Pois, escoitade que volo conto...

"Corría o ano 1702 .  
O rei de España, Carlos II, morrera sen fillos e había guerra entre os partidarios dos seus dous posibles sucesores. 
O control do tráfico marítimo con América era prioritario para as potencias europeas.
Varios  galeóns españois viñan do novo mundo cargados de tesouros: ouro, prata, perlas, pedras preciosas, e tamén especias, madeiras nobles  e teas... (actualmente valerían uns 50.000 millóns de euros). Navegaban baixo a protección de varios navíos franceses.
O capitán da flota franco-española, debido ao cansanzo e ao vento favorable,  decidiu facer unha parada na ría de Vigo para reaprovisionarse  e descansar. Eran en total 40 navíos os que buscaron refuxio no fondo da ría, na enseada de San Simón.

Mentres esperaban o permiso do rei para desembacar e organizar o transporte das mercadorías, dispuxéronse os medios para a defensa dos 14  galeóns chegados do Novo Mundo cos tesouros .
Máis de 6000 persoas e 1000 carros de bois foron os encargados de descargar as riquezas .
O 23 de outubro de 1702 os ingleses descobren o escondite e ordean atacar á flota franco-española. A enseada convértese nunha trampa sen posibilidade de escape para a flota española e os galeóns foron un branco fácil para a escuadra anglo-holandesa que era  moito máis numerosa  (150 navíos).
O capitán español ordenou incendiar e afundir os barcos que quedaban, algúns deles todavía con parte da súa carga, para que non caesen en mans inimigas.
Unha vez gañada a batalla, os atacantes saquearon Redondela e a illa de San Simón.
A armada inglesa abandoou  a ría de Vigo o 30 de outubro levando varios barcos apresados, entre eles un galeón español cargado cos tesouros recollidos. Este galeón encallou cerca das illas Cíes e afundiu. Aínda hoxe non se puido dar coa súa localización exacta. Dende aquela, a Ría de Vigo garda o mellor e máis famosos dos seus segredos: a posible presenza  de innumerables riquezas e tesouros debaixo das súas augas.
Como resultado da victoria dos ingleses , hai unha rúa en Londres, cerca de Picadilly Circus que se chama "Vigo Street".

Para recordar, protexer e ensalzar este patrimonio escondido levouse a cabo a construción  dun centro de interpretación en Rande (Meirande) que nos mostra todo o relacionado con esta batalla. Hai 7 salas onde se recrea un pouco a época, as  mercadorías e a batalla. 
E alí fomos nós...
Vimos as maquetas dos barcos que participaron na batalla, unha sala decorada como se fora o camarote do capitán, a bodega e os canóns ... 
Probamos os zapatos e os traxes dos buzos que se sumerxían para buscar tesouros...
Ata collemos na man unha das balas de canón ... 
Pesaba máis de 15 kilos!!!

Click to play this Smilebox slideshow
Create your own slideshow - Powered by Smilebox
Customize a free slideshow

mércores, 15 de xuño de 2016

Un agasallo para a biblio

Candela, Lara e Raquel  trouxeron un agasallo ben fermoso para a Biblio: "En Cabárceno se sigue cantando". É un libro musical no que elas participan cantando unha canción.
As cancións son de Susa Herrera e están dedicadas a varios dos animais que viven no  Parque da Natureza de Cabárceno, en Cantabria.

Se queredes ver a súa actuación e de paso saber algo máis sobre os animais dos diferentes continentes, non deixedes de achegarvos á Biblioteca.

luns, 6 de xuño de 2016

Ben falado!

Coma colofón do mes das letras, pedimos a colaboración das familias para reivindicar a importancia da nosa lingua, unha lingua que é patrimonio de todas e todos os galegos porque é o noso principal sinal de identidade , unha lingua que debemos coidar coma un tesouro porque O GALEGO É A VIDA...
E aquí podedes ver aos papás, mamás. avós, avoas, tías, irmáns ... voluntari@s  poñendo en valor o noso idioma:

FalemosGalego by Slidely Slideshow

martes, 31 de maio de 2016

Fin de Proxecto: O Castro de Trelle

A actividade final do proxecto anual resultou 
moi divertida para @s alumn@s de 4º, que elixiran como tema a BD "Os barbanzóns" (e para @s de 5º e 6º que os acompañaron nesta saída)

Visitamos o monte do castro de Trelle, que está aquí ao lado e, tras ler o noso manifesto, quedamos convertidos nas súas madriñas  e  padriños oficiais, nos custodios do seu territorio e a nosa misión de agora en diante será coidalo e poñelo en valor.
.


Segundo nos explicou Santos, o noso garda forestal preferido, o castro non está excavado. Fixéronse prospeccións xa hai tempo e sábese que era un recinto moi grande con dúas murallas concéntricas e moitas casas circulares. Moitas das pedras desapareceron e foron empregadas para construír casas nos pobos veciños. 

Tamén nos falou da simboloxía das árbores, nos recordou o que debiamos facer para coidar o bosque e os seus habitantes e nos deu unha clase de orientación . Alí deixamos plantados un acivro e un carballo.

Aproveitamos tamén para visitar a base de helicópteros . 

Sabiades que a de Toén é a base con maior número de horas de vó para extinción de incendios do estado español? 
E que o seu helicóptero é o mais grande de Galicia? Pode transportar 16 persoas.

Na base  traballan o piloto, un enxeñeiro de montes que é o encargado da base, dous xefes de brigada e 20 persoas máis que colaboran na extinción de incendios en toda Galicia. Realizan un traballo en equipo coordinado.





sábado, 28 de maio de 2016

Abraham Carreiro

O pasado luns 23 de maio visitounos o  ilustrador Abraham Carreiro.
Deunos a coñecer en que consiste a súa profesión e como chegou a ser un debuxante de éxito.
Compartiu co alumnado de 3º, 4º, 5º e 6º un obradoiro de Banda Deseñada  baseandose nos libros que estiveron traballando dentro do Proxecto anual e que tiveron grande éxito : "Estudios Tex" e "Xoeliki"
Nun papel en branco comezou a debuxar distintos personaxes dos libros, cunha rapidez que nos deixou abraiados...
Despois foi explicando como debuxar diferentes tipos de caras e como cambiar as expresións faciais dun personaxe  para que mostre a súa personalidade ou o seu estado de ánimo  (bo, malo, enfadado, durmido, sorprendido, namorado...)

Con todas as súas ensinanzas, cada un de nós tratou de debuxar  un personaxe ...

E se lle gustan... e inclúe algún deles no seu próximo traballo?
Pasárasevos a  idea  pola cabeza?


AbrahamCarreiro by Slidely Photo Gallery

Tod@s os rapaces e rapazas estiveron moi interesados e atentos e formularon unha chea de preguntas ao final da súa charla.

mércores, 25 de maio de 2016

Proxecto Escornabots

Somos un dos 20 centros de toda Galiza elixidos para participar no proxecto piloto "Escornabots na Biblioteca Escolar" e así introducir os robots e a linguaxe de programación  na escola.

Por iso Sali, do grupo de Biblioteca,  asistiu o pasado 13 de maio a unha xornada de formación en Santiago onde recibiu os materiais necesarios para a construción dos primeiros robots.


Aquí vos presentamos o  primeiro integrante do noso  Equipo de Escornabots. 
Tuneámolo un pouquiño para que as nenas e os nenos saiban cara onde desprazalo.
Só nos queda elixir un nome para él.
Aceptamos propostas...





 

martes, 24 de maio de 2016

Os tres porquiños

Continuando coa  programación do mes de maio, un público moi entusiasta encheu a bliblioteca para  disfrutar do espectáculo que prepararon Clara, Hugo e Damián, alumn@s de sexto, xunto coa profe Lali .
E non saíron defraudados!
Tod@s disfrutamos do teatriño de monicreques que nos ofreceron. Eles mesmos reescribiron os diálogos  tomando como modelo o conto dos tres porquiños. 
A ver que opinades...

domingo, 22 de maio de 2016

A festa das Letras 2016


Por  mor dos exames da AVALDIA dos nenos e nenas  de 6, tivemos que pospoñer a nosa festa para o venres día 20 de maio.
Como podedes ver no programa, houbo bailes, cancións e representacións teatrais nas que , coma sempre, participaron todas as nenas e nenos do cole.


Foron moitas as familias que nos acompañaron na celebración da Festa da nosa Lingua .
Para os e as que non puidestes compartir este día connosco, ou para os que queirades velas de novo, recollemos en video algunhas das actuacións:

E. Infantil: O cuco

O Cuco - E. Infantil from Efren Esquio on Vimeo.

1º e 2º: As cores a xuizo



3º de EP : Na procura dun personaxe



4º de EP : Berenguela


5º e 6º de EP : Recitado de poemas de Manuel María -  En galego, xa!

xoves, 19 de maio de 2016

Hai moitos anos...

Podería ser o comezo dun conto, pero non o é...

Hai moitos anos, 20 para ser exactos,  adiviñades que grande poeta da nosa terra estivo no cole?
Dareivos unhas pistas...

- Naceu en Outeiro de Rei 
- Estudou en Lugo
- Traballou como procurador en Monforte
- Dedicouse á política pero tamén a difundir e reconstruir a cultura galega, a lingua e os nosos sinais de identidade
- Foi xornalista, mestre, editor, libreiro ... 
- Denunciou todo tipo de inxustizas: a emigración, a contaminacion dos mares, as indignas condicións laborais de moita xente...

Aínda nada? 
Pois ...  a ver se con estas outras pistas...

- Dedicouse á creación literaria: narrativa (13 obras), teatro (26 pezas), ensaio (13 obras) e , sobre todo,  poesía (máis de 50 obras)
- Foi membro da Real Academia Galega

Xa adiviñastes, non si?

Pois, sí... Trátase de  MANUEL MARÍA


Na Biblioteca temos varios dos  libros que escribiu : "A tribo ten catro ríos","Viaxes e vagancias de MP","Cando o mar foi polo río", "Os soños na gaiola" "Terra Chá" , algúns deles coa súa sinatura e unha dedicatoria


manuelMAria by Slidely Photo Gallery

As familias contan : o papá de Antonio

19 de maio: As familias continúan compartindo connosco o seu tempo e as súas lecturas.  Antonio, o papá de Antonio Manuel, achegouse ao cole para lernos o conto "O desexo do Gato Klops"; un conto co que aprendemos que todos e todas somos valiosos e dignos de ser queridos aínda que non sexamos perfectos. 



GRAZAS POLA VISITA!

mércores, 11 de maio de 2016

Regalamos contos

Os nenos e nenas que quixeron  achegáronse a Biblio a escoitar os contos que prepararon os compañeir@s  de 6º

luns, 9 de maio de 2016

Maio no cole

Este ano, en vez de facer un maio, decidimos facer unha alfombra floral.
Para ser sinceros, a idea non foi nosa: os avós e avoas do Centro de Día convidáronnos a axudarlles e nós aceptamos.
O que non contabamos era coa chuvia...
Ir de paseo ata Toén é agradable (xa o temos feito varias veces) pero... chovendo!!!
Tivemos que "abortar" a "Operación Andaina-ata-Toén" e facer a alfombra no cole.

Todos e todas colaboramos e iso fixo o traballo máis divertido:
- Buscamos información sobre o proceso de elaboración deste tipo de alfombras en diferentes puntos de Galiza
.- Eliximos o motivo da nosa alfombra e debuxámolo nun papel
- Trouxemos unha morea de flores de diferentes clases e  separámolas segundo a súa cor.
- Por cursos, fomos recubrindo os espazos cos pétalos, seguindo as liñas marcadas no papel.

Recuperar as tradicións  é unha labor importante... !!

Podedes ver o proceso de elaboración e o resultado na fotogalería que segue:



Maio de flores by Slidely Photo Gallery

As familias contan: Iria e Adán

Venres, 6 de maio: Os papás de Martiño e Gabriel contáronnos o conto "As viaxes de Mimo" e  leváronnos en busca de persoas e culturas diferentes.




GRAZAS!!

luns, 2 de maio de 2016

As familias Contan: os papás de Álvaro

 29 de abril: Sira, a irmanciña de Álvaro, acompañou a Vanessa e David mentras nos contaban o conto "Crisol e a súa estrela". Estivo moi interesada na lectura ... E nós tamén.


GRAZAS por vir!!

As familias contan: A mamá de Antón

28 de abril: Patricia leunos en galego o conto "Antón el ratón"




GRAZAS 

As familias contan: papá de Martín

27 de abril: Ángel contounos o conto de "Cocorico" e gustounos un montón.




GRAZAS!

As familias contan: : os papás de Dani

26 de Abril: Inés e Jose, acompañados por Lucía, viñeron a contarnos o conto dunha nena que nunca quería ir á cama. Nós ata fixemos de caracois para axudala, e ao final conseguiu "durmir  coma un tigre" para repoñer forzas.




GRAZAS pola vosa compañía!!

mércores, 27 de abril de 2016

As familias contan: A mamá de Artai

26 de abril: Con Antía e o conto "Rosa Caramelo" aprendemos que non se poden facer diferenzas entre as persoas en función do seu xénero : as nenas e os nenos somos iguais e podemos facer as mesmas cousas.


Grazas!

domingo, 24 de abril de 2016

A Banda Deseñada arredor do mundo


Seguindo co proxecto no que estamos traballando, decidimos investigar sobre a banda deseñada nos diferentes paises do mundo. E fixémolo a través dun xogo:
Entregamos aos nenos/as uns sobres coas portadas de diferentes cómics . En equipos,  tiveron que adiviñar en que paises se editan.
Una vez feito isto, tiveron que colocalas nun mapamundi.

Powered by emaze

Para poder ver on line os cómics que empregamos,  e ademais colocados xa nos seus respectivos países, preparamos este mapa interactivo.

sábado, 23 de abril de 2016

Sábado de Libro

Os libros cultivan a nosa imaxinación e alimentan as nosa fantasía.
Son os nosos mestres e os nosos compañeiros de aventuras. Axudan a ampliar o noso vocabulario, permiten que nos acheguemos a outras culturas, que nos identifiquemos con outras persoas e que aprendamos mais sobre a nosa historia...

Hoxe, DÍA DO LIBRO, é un bo día para visitar unha libraría e elixir un libro, ou deixar que un libro nos elixa a nós ... 
Porque, como dí Pedro Feijoo, "para cada un de nós hai un libro, ou dez, ou cen...  Outra cousa é que esteamos dispostos a abrilos..." 

Para ler, todos os día son bos. 

Que me dicides valentes, atrevédesvos a entrar no mundo dos libros?


As nenas e os nenos da  EEI Barrionovo de Arteixo amósannos o valentes que son:



E en guiainfantil.com tamén nos animan a dar unhas cantas voltas ao mundo entre as páxinas dun libro: