domingo, 19 de noviembre de 2017

Cine en Super 8

O cine en Super 8 ten mais de 50  anos de historia.
Nos tivemos moita sorte e, grazas ao pai da profe Maite, puidemos ver películas antigas  e descubrir moitas cousas sobre este formato cinematográfico.
Amadeo trouxo a súa cámara e o seu proxector de Super 8, que mercou en Alemaña  hai case 50 anos,  e ensinounos  como se  monta a película  e como se unen varias cintas, porque cada unha so dura tres minutos.
Aprendemos que este formato apareceu para poñer ao alcance dos afeccionados a filmación de esceas familiares e ver películas cando na televisión non había tantas horas diarias  de emisión coma hoxe.
Tamén,  que para cargar a película había que meter un cartucho na cámara e logo levalo a revelar a un laboratorio de fotografía que a entregaba lista para usar no proxector.
As películas eran en branco e negro e non tiñan son, pero eran igual de divertidas .
Recoñecemos  moitos personaxes que todavía hoxe son favoritos dos nenos e nenas: Piolín e o gato Silvestre, Bugs Bunny, o pato Lucas, o rato Mickey e o seu can Pluto...  e descubrimos outros que non coñeciamos tanto: Speedy González, o gordo e o fraco ... Powered by emaze

sábado, 18 de noviembre de 2017

Multicines Efrén


Todos os xoves son "Xoves de curtas" no cole. 
Xa vos informamos días atrás dos cambios que iamos aplicar a esta actividade.
Para levalos a cabo, tivemos que elaborar todos os elementos necesarios: taquilla, entradas, carteleira... 
E hoxe foi a grande apertura dos Multicines Efrén.
Houbo unha grande afluencia de público e formáronse grandes colas de xente de todas as idades  para recoller as entradas. 


Xoves de Curtas by Slidely Slideshow

PELIcastañas

O magosto é unha data para celebrar, para iso é día festivo en Ourense. E, que mellor que indo a ver unha película?
Como lle damos tanto á cabeza,  fixémonos unha pregunta:
 Haberá salas de cine no país das castañas?
 E se as hai,... que películas poñerán?
Para quedarnos máis tranquilos, metémonos a deseñadores e decidimos crear nós os carteis desas películas que, se non o están , deberían estar en cartel nese país imaxinario, ... ou, por que non?, en calquera outro.

A ver se vos gusta a nosa selección:

PeliCastañs by Slidely Slideshow

E, como seguro que  nese país tamén estudian ingléscoma nós... ai van as nosas recomendacións para un ciclo de cine "in English"

Picade aqui para ir ao Blogue Skills

lunes, 13 de noviembre de 2017

O outono cheira a castañas

Pasado o Samaín, o outono tráenos unha nova celebración, o MAGOSTO, quizais a festa máis ourensá.
No cole sumámonos a esta tradición na que cada ano realizamos moitas actividades para converter este día nunha festa.
Non faltaron as castañas asadas e a fogueira, pero tampouco os obradoiros, a decoración das aulas  e os XOGOS : equilibrio con castañas, carreira de sacos, birlos, lanzamento de aros, paracaídas...


XogosMAgosto2017 by Slidely Slideshow

Un dez para o noso magosto:


Ceip Saco E Arce de Slidely by Slidely Slideshow

sábado, 11 de noviembre de 2017

Cinencia: Inventos de cine

Xa falamos anteriormente da relación do cine coa ciencia.
O cine nace da fotografía e esta está relacionada con dúas disciplinas científicas: a física (cámara oscura) e a química (reacción das sales de prata coa luz). 
Coa aparición do cinematógrafo, os irmáns Lumiere mostraron nas súas primeiras películas  unha vertiente científico-realista do cinema , mentras que  Georges Melie mostrou unha vertente fantastico-inventiva .
Máis adiante, tamén foi a ciencia a que propiciou a aparición do cine sonoro en 1927 con "O cantor de Jazz",  en 1939 , as cores en "O mago de Oz" e cinemascope en "West Side Story" ; a tecnoloxía dixital, con películas como "A guerra das Galaxias" e as técnicas informáticas que fixeron posible o cine de animación como "Toy Story" (1995).

En moitas das películas que coñecemos aparecen ideas revolucionarias que décadas atrás foron consideradas "ciencia ficción", pero que agora son unha realidade.
Imos mostrarvos unha serie de  inventos, avances, tecnoloxías que saltaron das pantallas de cine aos andeis das tendas

"Viaxe a Lúa" Georges Méliês 1902

"Metropolis" Fritz Lang -1927 

"Tempos modernos" Charles Chaplin 1936 


"Os supersónicos"  Hanna/Barbera 1962/87  




"Star Trek"  Leonard Nimoy 1966/69 



"2001, unha Odisea no espazo" Stanley Kubrik 1968


"O durmiñón" Woody Allen 1973 

"Blade runner" Ridley Scott 1982



"Star Wars" George Lucas 1983 

"Soños eléctricos" Steve Barron 1984 

"A rapaza de rosa" Howard Deutch 1986 

"Regreso ao futuro"  Robert Zemeckis 1989 



"Desafío total"  Paul Verhoeven - 1990 


"Minority report" Steven Spielberg 2002 


"Iron man" Jon Favreau -  2008

viernes, 10 de noviembre de 2017

Semana da Ciencia: A ciencia no cine

O cinema é maxia, pero tamén é ciencia.  A súa historia está intimamente ligada aos avances científicos.

Na Semana da Ciencia seleccionamos algunhas  películas infantís e xuvenís protagonizadas por científicos ou inventores. Algúns viaxaron ao futuro, outros salvaron o planeta, e moitos destes personaxes quedaron para sempre na historia do cinema.


O profesor chiflado (1963)
Julious Kelp, un profesor de química da universidade está farto de que os seus alumnos máis musculosos abusen del e decide apuntarse a un ximnasio para mellorar o seu aspecto físico. Cando ve que non o consigue, decide crear un brebaxe e cada vez que o bebe convértese nun xoven moi guapo



No corazón da terra (1977) 

Un científico inglés, obsesionado pola estrutura da terra, inventa unha máquina deseñada para viaxar ao centro do planeta. Decide formar parte do experimento e acompañado do seu axudante proban a máquina. O invento escapará ao seu control e mandará aos dous   a unha viaxe no tempo que os levará a Prehistoria.

 Triloxía: Regreso ao Futuro (1985-1990)

O adolescente Marty McFly faise amigo de Doc, un científico ao que todos toman por tolo. Cando Doc crea unha máquina para viaxar a través do tempo, un error fai que Marty chegue a 1955, cando os seus pais aínda non se coñeceran. Marty terá que conseguir que se coñezan, senón a súa existencia sería imposible.




Querida, encollín aos nenos (1989)
Un científico e inventor crea unha máquina que permite encoller o tamaño dos obxectos. Unha pelota activa a máquina por accidente e os seus fillos son reducidos a un tamaño microscópico. Vivirán unha auténtica aventura intentando atravesar o xardín, transformado nunha auténtica xungla para eles, ata chegar á casa.


Uns peques xeniais (1997)

Dous cientícos fundan un parque temático para poñer en prácticas as súas teorías de que certos nenos de dous anos están dotados de unha grande sabedoría, heredada senéticamente, a cal se perde cando aprenden a falar. Os esforzos da parella céntranse en achar un método que lles permita descifrar a linguaxe dos bebés, antes de que empecen a falar.



Flubber e o profesor chiflado (1997)


Un simpático e despistado profesor que traballa nunha universidade que está a punto de pechar por falta de diñeiro  fai un sorprendente descubrimento : unha sustancia voadora que produce enerxía e que se move a velocidades supersónicas (Flubber)

Jimmy Neutrón, o neno inventor (2001)

Jimmy e os seus amigos viven en Retroville, unha cidade moi aburrida, por iso están agardando a inauguración do novo parque de atraccións. Mentres montan na montaña rusa, todos os adultos son abducidos polos Yokians, uns alieníxenas verdes con cara de ovo.


 Descubrindo aos Robinsons (2007)

Cando Lewis coñece a Wilbur Robinson, un rapaz misteriososo que ven do futuro, decide acompañalo nunha viaxe a través do tempo onde descubre o segredo da familia Robinson

Chuvia de albóndigas (2009)
Flint, un xoven científico soña con inventar  algo que mellore a vida de todos os seus veciños. Despois de intentalo varias veces logra crear algo que funciona: unha máquina que fai caer comida do ceo.


Planet 51 (2009)
Chuck, un astronauta humano un pouco torpe, chega ao Planeta 51 e os habitantes fuxen despavoridos. Cren que é unha invasión extraterrestre e comezan a perseguilo. Axudado polo robot Rover e dun neno do planeta, tratará de escapar para non rematar convertido nunha peza do Museo Espacial de Invasores Alieníxenas.


Frankenweenie (2012)
Trala inesperada morte do seu can Sparky, o pequeno Victor válese do poder da ciencia para traelo de novo á vida... cuns poucos axustes. Victor intenta mantelo agochado, pero cando Sparky consegue saír... o pobo enteiro aprenderá que crear unha nova vida  pode converterse en algo monstruoso.


Camiñando entre dinosauros (2013)
Película que mestura acción con criaturas creadas por ordenador en animación 3D, para introducirnos no mundo prehistórico e vivir de preto a evolución dos dinosauros dende que rompen o ovo, pasando pola loita pola comida e o enfrentamento cos depredadores que os acosan.

 

Atrapa a bandeira (2015)
Un millonario decide colonizar a lúa e o goberno de EEUU e a NASA teñen serias dificultades para frear as súas intencións, xa que ademais quere apropiarse do Helio 3, a fonte de enerxía do futuro. 

  

miércoles, 1 de noviembre de 2017

Un Samaín de Alucine

Estes días estivemos moi ocupados abrindo cabazas para pór enriba dos valados e preparando os disfraces  para participar na festa de Samaín. 

Os nenos/as tiveron que investigar en que película de terror aparece o seu disfrace e escribir os datos sobre a mesma: director, personaxes principais, actores e actrices que participan e ano de produción da mesma.

Tede moito coidado cos mortos, coas almas errantes, cos trasnos e coas fadas e, se vedes algunha bruxa, chiscádelle un ollo!

Se queredes ver todo o que fixemos, picade na imaxe e buscade os enlaces... 


martes, 31 de octubre de 2017

Xoves de curtas

O xoves é dia de cine no cole. 
A biblioteca convértese nunha sala de cine e os rapaces asisten a proxección  dunha  curtametraxe seleccionada.

Neste mes de outubro, as elixidas foron:

"A viaxe a Lúa" de Georges Méliès (1902), por ser a primeira película de ciencia ficción da historia do cine

"Mr Bean na Biblioteca" de Rowan Atkinson (1990/95). Un pouco de humor para  celebrar a Semana da Biblio

"A bruxa Regañadentes" (2005) adaptación da historia publicada por OQO, para  pasar un pouco de medo ...
Informamos que,debido á estupenda acollida que ten esta actividade, a partires do vindeiro mes de novembro imos cambiar o sistema:

Poderedes elixir entre catro salas de cine, con catro curtas diferentes.
Teredes que coller unha entrada na taquilla para asistir á proxección que queirades.
 O aforo é limitado, así que teredes que darvos présa, para que ninguén se vos adiante...

Vémonos!


sábado, 28 de octubre de 2017

Moito mellor se lemos xuntos

Durante a semana, as madriñas e padriños de lectura deseñaron cadansùa tarxeta para os seus afillados/as.

O xoves, os  pequenos/as seleccionaron unha das tarxetas e así elixiron ao seu padriño ou madriña  de lectura. 


Padriños/Madriñas de Lectura by Slidely Photo Gallery

E o venres foi o día grande do apadriñamento lector: Cada padriño e madriña foi buscar ao seu afillado/a e repartidos polo patio, as aulas e os corredores disfrutaron do seu momento de lectura compartida.
Con esta actividade pretendemos a mellora da lectura, pero ademáis contribúe a desenvolver as relacións interpersoais dos alumnos e o achegamento entre nenos e nenas de idades diferentes



LemosXuntos by Slidely Photo Gallery

domingo, 22 de octubre de 2017

A viaxe das mochilas

Hoxe as mochilas comezaron a súa viaxe  

Son un intento de achegar un certo número de documentos procedentes da biblioteca escolar para que os disfrute toda a familia durante unha semana (de luns a luns). Non hai directrices concretas de uso e en cada casa usaranse de forma diferente.
Con elas pretendemos dinamizar os fondos da biblioteca e facilitar o acceso aos libros a nenos e nenas e tamén as familias, provocar na casa situacións lectoras, compartir momentos co libro como protagonista e ler xuntos

No seu interior atoparedes  a relación dos materiais que contén e unha folla en branco na que todos os membros da familia poden escribir as súas impresións e valorar a experiencia.




Xa sabedes que o servizo de préstamo da Biblio tamén se fai extensible a todas as nais e pais. 
Picade na imaxe ou no enlace e descubriredes en que consiste a actividade  que chamamos De 13 a 100



DE 13 a 100